Galleri Format

Kritikk, Stavanger Aftenblad

“There is a crack, a crack in everything. That’s how the light gets in.”
- L. Cohen

Utstillinga BORN, NOT HANDMADE er ei vidareføring av mitt fokus dei siste åra rundt potensialet menneske/maskin. Dette emneområdet har ført til ei utforsking ved Norsk Teknisk Porselensfabrikk, Fredrikstad, som igjen har ført til japanske røter og estetikkfilosofen Yanagi.  Serien «Hyllest til Soetsu Yanagi» er knytt til hans arbeid rundt te-meistrane og te-seremonien. Deira naturromantiske ideal for ei teskål var «born, not made». Mine objekt er laga gjennom kunstnerisk seleksjon av maskinelt «født» materiale. Hyllesten til Yanagi er ganske kompleks, eg beundrar hans glitrande essays, men er kritisk til konsekvensane. Saman med Bernhard Leach representerte han ei tradisjonelt prega regressiv antikunst-haldning, heilt til post-modernismen kom på 1970-80-talet som ei enorm frigjerande kraft for keramikken.

Arbeida har «blitt til» som ein rest i industriell produksjon av teknisk porselen. Eg har leita dei opp, valt dei nøye ut, tatt omsorgsfullt vare på dei, fått dei tørka, brende og glaserte slik eg vil ha dei. Innhaldet står og fell med krafta dei ulike verka har, rytmen i monteringa, kommunikasjonen gjennom samanstillingane. Krafta i det kompakte, det rå, dei skarpe kantane, sprekkene.

I tillegg til den omfattande Yanagi-serien er her nokre assosiative helsingar til kunstnarkollegaer, og som kontrast eit større, sentralt golvarbeid.

- Jens Erland